- XƏBƏRLƏR -
7429 Arxiv
Mərakeş səfiri ilə görüş
2018.09.19 12:38

Sentyabrın 19-da Mərakeşin ölkəmizdəki fövqəladə və səlahiyyətli səfiri Mohammad Adil Embarş Azərbaycan Dövlət Dəniz Akademiyasının qonağı olub. Rektor Çingiz Əliyevlə görüşdə Akademiyanın tədris potensialı, tələbələrə yaradılan sosial-məişət şəraiti, imtiyaz və güzəştlər haqqında geniş məlumat verilib, mərakeşli tələbələrin dənizçilik peşələrinə yiyələnmək üçün bu təhsil ocağına dəvət olunması təklifi səsləndirilib. Mohammad Adil Embarş oz növbəsində Çingiz Əliyevi Mərakeş Krallığına dəvət edib. Görüşdə həmçinin gələcək əməkdaşlıq perspektivləri, kadr mübadiləsi, qarşılıqlı əlaqələrin genişləndirilməsi yolları müzakirə olunub.

Sonra qonaq müxtəlif naviqasiya və maşın şöbəsi simulyatorları, gəmi energetik qurğuları laboratoriyası, ADDA-nın tarix muzeyi ilə tanış olub. Akademiyanın müəllimləri maşın, mexanizm və simulyatorların iş prinsipləri haqqında ətraflı məlumat veriblər. Mohammad Adil Embarş tədris prosesi ilə maraqlanaraq,  tələbələrlə söhbət edib.

Sonda səfir maraqlı görüş üçün təşəkkürünü bildirib, Akademiyadan xoş təəssüratla ayrıldığını söyləyib.

Qeyd edək ki, cari lin əvvəlində Azərbaycan Dövlət Dəniz Akademiyası ilə Mərakeş Ali Dəniz Araşdırmaları İnstitutu arasında əməkdaşlığa dair Niyyət Protokolu imzalanıb. Sənədə Dəniz Akademiyasının rektoru Çingiz Əliyev və Mərakeş səfiri Mohammad Adil Embarş imza atıblar. 5 illik müddətə imzalanan Niyyət Protokolu dənizçilik sahəsində təlim və tədqiqatlarla bağlı akademik əlaqələrin qurulmasını, tərəflər arasında mədəni, elmi və təhsil mübadiləsinin yaradılmasını və genişləndirilməsini, ümumi layihələrin və birgə proqramların həyata keçirilməsini nəzərdə tutur.