- GƏMİ SÜRÜCÜLÜYÜ FAKÜLTƏSİ -

- GƏMİ SÜRÜCÜLÜYÜ FAKÜLTƏSİ -

Gəmi sürücülüyü fakültəsi dənizçilik sahəsində bakalavriat, magistratura və doktorantura təhsil səviyyələrində aşağıdakı ixtisaslar üzrə mütəxəssis hazırlığını aparır

BAKALAVRİAT:

- 050620 – Dəniz naviqasiyası mühəndisliyi;                                                       

- 050618 -  Gəmiqayırma və gəmi təmiri mühəndisliyi;

MAGISTRATURA:

- 060620 – Gəmiçilik və gəmilərin hərəkətinin idarə edilməsi;

- 060618 –  Dəniz texnikası və texnologiyası mühəndisliyi;

DOKTORANTURA:

- 3319.02 – Gəmiçilik və su nəqliyyatının istismarı;

- 3319.03 – Gəmiqayırma və gəmi təmiri texnologiyası

Fakültədə  ümumilikdə  29 akademik qrupda 500-ə qədər tələbə təhsil alır: əyani təhsilalma formasında  bakalavriat səviyyəsi üzrə 21 qrup,  qiyabi təhsilalma formasında  bakalavriat səviyyəsi üzrə  2 qrup,  magistratura səviyyəsində 6 qrup.

İxtisaslar  üzrə - "Dəniz naviqasiyası mühəndisliyi" 13 qrup,  "Gəmiqayırma və gəmi təmiri mühəndisliyi "  8 qrup, Qiyabi təhsilalma formasında isə 3 qrup “Dəniz naviqasiyası mühəndisliyi” ixtisası üzrə  təhsil alır.

“Gəmi sürücülüyü” fakültəsində doktorantura səviyyəsində 3319.02 – “Gəmiçilik və su nəqliyyatının istismarı” və 3319.03 – “Gəmiqayırma və gəmi təmiri texnologiyası” ixtisasları üzrə elmi-pedaqoji kadrların hazırlığı həyata keçirilir.  Fakültədə 21 doktorant və dissertant elmi iş üzərində çalışır. Onların elmi tədqiqatlarının əsas müdəaları ölkəmizin və  xarici elmi jurnallarında dərc olunur.

 “Gəmi sürücülüyü” fakültəsinin tərkibinə  "Dəniz naviqasiyası", “Gəmiqayırma və gəmi təmiri” və "Humanitar fənlər" kafedraları daxildir.

Fakültədə  tədris prosesinə 5  professor,  10 dosent,  24 baş müəllim,  9 assistent , 2 laboratoriya müdiri, 3 baş laborant və 1 tədris ustası və istehsalatdan dəvət olunmuş yüksək səviyyəli mütəxəssislər  cəlb olunurlar.

Fakültə yarandığı gündən Beynəlxalq Dənizçilik Təşkilatının “Dənizçilərin hazırlanmasına, onlara diplom verilməsinə və növbə çəkməyə dair” Beynəlxalq Konvensiyayasının tələblərinə uyğun olaraq təhsilini qurmuşdur. Bu məqsədlə bütün ixtisaslar üzrə baza təhsil proqramları, tədris planları və təhsilin dövlət standartları hazırlanmış və müvafiq qaydada  təsdiq olunmuşdur.

2002-ci ilin oktyabrında Akademiya dənizçi mütəxəssislərin hazırlanması sahəsində keyfiyyətin menecmenti sistemi üzrə İSO 9001-2000 Beynəlxalq standartına uyğun sertifikata layiq görülmüş və 2010-cu ilin fevralın 1-dən isə Akademiyada İSO 9001-2008 keyfiyyət menecment sistemi tətbiq edilir. Fakültədə tədris prosesi 10 fevral 2018-ci il tarixindən İSO 9001-2015 keyfiyyətin menecmenti sisteminin qoyduğu tələblər əsasında qurulmuşdur.

Fakültə  Türkiyə, Almaniya, Polşa, Bolqarıstan, Qazaxıstan, Gürcüstan, Ukrayna, Latviya və digər xarici dövlətlərin ali dənizçilik məktəblərinin uyğun kafedraları ilə  əməkdaşlıq edir.

Gəmiçiliyin donanması yeni və müasir gəmilər hesabına zənginləşdikcə, fakültənin tədris prosesi də yeni trenajorlarla təmin edilir və laboratoriya şəbəkəsi genişlənir. Fakültədə  elmin son nailiyyətləri əsasında yaradılan müasir avtomatik idarəetmə sisteminə malik gəmiləri idarə etməyi bacaran dənizçilər hazırlamaq və   tədrisin dünya standartlarına cavab verməsi əsas məsələlərdən biri kimi qarşıda durur. Bu məqsədlə fakültənin texniki bazasının  müasir avadanlıq və trenajorlarla təchiz edilməsi davam edir.

“Dəniz naviqasiyası” kafedrasının bazası 1996-cı ildə qoyulmuşdur və akademiyanın ən aparıcı kafedralarından biridir. Kafedra “Dəniz naviqasiyası mühəndisliyi” ixtisası üzrə kadr hazırlığını həyata keçirir. Son illərdə “Dənizçilərin hazırlanmasına, onlara diplom verilməsinə və növbə çəkməyə dair” Beynəlxalq Konvensiyayasının tələblərinə cavab verən “Engine room simulator ERS-4000″, “NT-4000″, “TQS” və “NS-3000″ trenajorları alınaraq tədris prosesində istifadə edilir. Eyni zamanda fakültə  tələbələrinin istifadəsində olan “Radarla müşahidə və təsvir”, “Dəniz astronomiyası və naviqasiya çəkilişi”, “Elektron xəritə displeyinin və informasiya sisteminin istismar qaydaları”, “Fəlakət zamanı qlobal dəniz rabitə sistemi” (GMDSS) trenajorları və  “Sabit Orucov” adına tədris gəmisi yüksək ixtisaslı dünya standartlarına cavab verən dənizçi kadrların hazırlanmasına əsas verir.

“Gəmiqayırma və gəmi təmiri” kafedrasının əsası 2002–ci ildə qoyulmuşdur.. Kafedranın məzunları təyinata  əsasən Azərbaycan Xəzər Dəniz Gəmiçiliyi QSC-nin tabeliyində olan  müxtəlif qurumlara, o cümlədən gəmiqayırma və gəmi təmiri zavodlarına işləməyə göndərilir və həmin müəssisələrdə mühəndis, texnoloq və s. vəzifələrdə çalışırlar. Bundan başqa kafedranın məzunları xarici ölkələrə məxsus şirkət və firmaların gəmiqayırma və gəmi təmiri zavodlarında mühəndis kimi də işləyirlər.

“Gəmiqayırma və gəmi təmiri texnologiyası” istiqamətində gəmi mühərriklərinin məsul hissələrinin istismar göstəricilərinin  yaxşılaşdırılması problemi üzrə silindr oymaqlarının istismar  şəraitinin,  hazırlanma və bərpa texnologiyalarının   təhlili və   təkmilləşdirilməsi mövzularında dövlət büdcəli elmi-tədqiqat işləri yerinə yetirilir.

Tələbələrimiz yelkənli qayıq, futbol, güləş və şahmat üzrə yarışlarda iştirak edirlər. Yelkənli qayıq yarışlarında yüksək nəticələr əldə edilmişdir.

Hazırda fakültədə Türkiyə, Rusiya, Qazaxstan, Türkmənistan, Gürcüstan və digər xarici ölkələrdən tələbələr təhsil alır. Tələbələr tədrislə yanaşı, həm də fakültənin  elmi-tədqiqat laboratoriyalarında aparılan  araşdırmalarda iştirak edirlər.

 

 

Fakültənin dekanı:  Abbasov Elnur Oruc oğlu  

texnika üzrə fəlsəfə doktoru, dosent

Tel.:   (+99450) 278 06 76

E-mail:   elnur.abbasov@acsc.az

 

{images}